Ədliyyə Akademiyasında oktyabr ayı ərzində icra məmurları üçün “Elektron icra sistemindən istifadə qaydaları ” mövzusunda iki təlim keçirilib.

Ümumilikdə 21 nəfər icra məmurunun iştirak etdiyi kursda “Qiymətləndirmə və hərracın keçirilməsi”, “Borclunun ölkədən getmək hüququnun müvəqqəti məhdudlaşdırılması”, “Elektron icra sisteminin tətbiqi qaydaları” mövzuları üzrə mühazirələr dinləyicilərin diqqətinə çatdırılıb.

Ədliyyə Akademiyasında icra məmurları üçün davamlı ixtisasartırma kursları və təlimlər keçirilir.

Oktyabr ayında Ədliyyə Akademiyasında “Alimentin tutulması, uşaqla ünsiyyətdə olma və uşağın alınıb-verilməsi tələblərinə dair məhkəmə qərarlarının icrası işinin təkmilləşdirilməsi” mövzusunda ixtisasartırma kursu keçirilib.

15 icra məmurunun iştirak etdiyi təlimdə “Uşağın alınıb-verilməsi və uşaqla ünsiyyət tələbinə dair icra sənədlərinin icrası zamanı uşağın mənafeyinə zərər vurmadan icranın təmin ounması”, “Alimentin tutulması, uşaqla ünsiyyətdə olma və uşağın alınıb-verilməsi tələblərinə dair məhkəmə qərarlarının icrası zamanı icra məmurları tərəfindən yol verilən xarakterik nöqsanlar və onların aradan qaldırılması üzrə görülən tədbirlər”,“Alimentin tutulmasına dair icra sənədlərinin icrası qaydası”mövzuları üzrə mühazirələr dinləyicilərin diqqətinə çatdırılıb.

Prezident İlham Əliyev tərəfindən 2019-cu il ölkəmizdə "Nəsimi ili" elan olunaraq böyük Azərbaycan şairi və mütəfəkkiri İmadəddin Nəsiminin anadan olmasının 650 illiyi geniş qeyd edilir. Bu münasibətlə Ədliyyə Nazirliyi tərəfindən Nəsiminin həyat və yaradıcılığına həsr olunan silsilə tədbirlər təşkil olunur, o cümlədən gənclərə mütaliəyə marağın artırılması məqsədilə "Kitab günü" keçirilib, nazirliyin Penitensiar xidmətinin cəzaçəkmə müəssisələrinin kitabxana fondları Nəsiminin və digər müxtəlif bədii, publisistik və elmi əsərlərdən ibarət 4 minə yaxın kitabla zənginləşdirilib, ədliyyə işçiləri "İmadəddin Nəsimi – 650" adlı geniş kitab sərgisi ilə tanış olublar.
Oktyabrın 17-də Ədliyyə Nazirliyinin təşkilatçılığı ilə Ədliyyə Akademiyasında Nəsiminin 650 illiyinə həsr olunmuş "Nəsimi yaradıcılığında humanizm" adlı ədəbi-bədii tədbir keçirilib.

2015-ci ildən Avropa Şurası və Ədliyyə Akademiyasının birgə təşkilatçılığı ilə Avropa Şurası və Avropa İttifaqı tərəfindən Şərq Tərəfdaşlığı ölkələrində həyata keçirilən “Proqramlar üzrə Əməkdaşlıq Çərçivəsi”ndə “Azərbaycanda məhkəmələrin səmərəliliyinin artırılmasına, hakimlərin təliminin təkmilləşdirilməsinə və məhkəmələrdə özünü-idarəetməyə dəstək” layihəsi həyata keçirilib.

Cari ilin mart ayından etibarən adıçəkilən layihənin icrası  “Yaxşı idarəçilik üçün tərəfdaşlıq” proqramı çərçivəsində davam etdirilib. Layihə çərçivəsində ilkin olaraq təlimçilər hazırlanıb, onların siyahısının yenilənib və hakimlər, hakimliyə namizədlər, məhkəmə aparatı işçiləri üçün silsilə təlimlər keçirilib. Layihənin əsas məqsədi CEPEJ alətlərinin milli səviyyədə tətbiq etməklə Azərbaycan məhkəmələrində səmərəliliyin və keyfiyyətin artırılmasına nail olmaq, CEPEJ indikatorları əsasında məhkəmələrin fəaliyyəti ilə bağlı hesabatların vahid metodologiyasının işlənib hazırlanmasıdır.

Sumqayıt Apellyasiya Məhkəməsində Sumqayıt Apellyasiya və Sumqayıt İnzibati-İqtisadi məhkəmələrində çalışan məhkəmə aparatı işçiləri üçün “Məhkəmələrdə müasir informasiya-kommunikasiya texnologiyalarının tətbiqi məsələləri” mövzusunda təlim keçirilib.

Məhkəmə aparatı işçiləri üçün keçirilən təlim zamanı“ Məhkəmə-hüquq sistemində islahatların dərinləşdirilməsi haqqında” Azərbaycan Respublikası Prezidentinin 03 aprel 2019-cu il tarixli Fərmanı”, “Məhkəmələrdə müasir informasiya-kommunikasiya texnologiyalarının tətbiqinin əsasları”,“Elektron məhkəmə informasiya sistemindən məhkəmələrdə səmərəli istifadə məsələləri” barədə mövzular tədris olunub.