Ədliyyə Akademiyasında keçirilən hakimlərin ixtisasartırma kurslarında təcrübi məsələlərin tədrisinə xüsusilə diqqət yetirir.

Bu məqsədlə Ədliyyə Akademiyasında keçirilən ixtisasartırma və ixtisasa buraxılış kurslarının müəllimləri (təlimçiləri) əsasən təcrübi əməkdaşlar sıralarından seçilir. Bu seçim meyarı keçirilən dərsləri daha  maraqlı edir  və ən əsası təcrübi baxımdan əhəmiyyətini artırır.

Ədliyyə Akademiyası Avropa Şurasının 2014-2016-cı illər  Azərbaycan üçün Fəaliyyət Planının bir hissəsi olan “Avropa İnsan Hüquqları Konvensiyası və Avropa İnsan Hüquqları Məhkəməsinin presedent hüququnun tətbiqi” adlı  Layihənin icrasını davam etdirir. Layihə çərçivəsində 2015-ci ildə hakimlər, vəkillər, Ədliyyə Akademiyasının müəllim heyəti və digər Praktik hüquqşünaslar üçün Təlimçilər üçün Təlimlərin (ToT) keçirilməsi nəzərdə tutulmuşdur. Keçirilən təlimlər nəticəsində 60 nəfər iştirakçıdan 40 nəfər təlimçi seçilmişdir. Seçilən təlimçilərə may-oktyabr ayları ərzində 4 seminar təşkil edilmişdir. Seminarlarda təlimçilər “Avropa İnsan Hüquqları Konvensiyası” sahəsində biliklərini, habelə pedoqoji təcrübələrini dərinləşdirmişlər.

Ədliyyə Akademiyası tərəfindən xarici dövlətlərin ixtisaslaşmış tədris qurumları və hüquqşünasların peşəkar birlikləri ilə əlaqələrə mühüm önəm verilərək tədris prosesində beynəlxalq təcrübənin öyrənilməsinə, qabaqcıl təlim modellərinin tətbiqinə xüsusi diqqət yetirilir.

Bu günlərdə Ədliyyə Akademiyası və Vəkillər Kollegiyası tərəfindən ölkəmizdə səfərdə olan Avropa Vəkillər Kollegiyaları və Hüquq Cəmiyyətləri Birliyinin (CCBE) nümayəndələri ilə birgə "Vəkillərin etik davranış qaydaları" mövzusunda beynəlxalq seminar keçirilib. Seminarda vəkillərin etik davranış məsələləri ilə bağlı müxtəlif ölkələrin təcrübəsinə diqqət yetirilib, CCBE tərəfindən qəbul olunmuş "Avropada vəkil peşəsinə dair əsas prinsiplər haqqında Xartiya" və "Avropa vəkillərinin davranış Kodeksi"nə dair təqdimatlar dinlənilib, faydalı fikir və təcrübə mübadiləsi aparılıb.

Ədalət mühakiməsinin səmərəliliyinin artırılması üzrə görülən tədbirlər çərçivəsində hakimlərin peşəkarlıq səviyyələrinin yüksəldilməsinə, o cümlədən məhkəmə fəaliyyətində müasir texniki vasitələrdən istifadəyə mühüm  əhəmiyyət verilir.  

Bununla əlaqədar Ədliyyə Akademiyası tərəfindən müasir İKT-lərlə təchiz edilmiş Bakı şəhəri Yasamal Rayon məhkəməsinin inzibati binasında hakimlər üçün "Məhkəmələrdə müasir informasiya-kommunikasiya texnologiyalarının tətbiqi məsələləri" mövzusunda təlim təşkil edilib.

Ədliyyə Akademiyası tərəfindən Avropa Şurası ilə birgə insan hüquqları ilə bağlı vəkillərin və hüquq müdafiəçilərinin bacarıqlarının artırılmasına dair birgə iki illik layihə həyata keçirilir.

Həmin layihə çərçivəsində Şəki şəhərində ayrı-seçkiliyin qadağan olunması baxımından İnsan Hüquqları üzrə Avropa Konvensiyasının ayrı-ayrı müddəalarına, xüsusilə mülkiyyətin müdafiəsi, şəxsi həyata və ailə həyatına hörmət hüquqlarının qorunmasına həsr olunmuş təlimlər keçirilib.