Hakimlərin davamlı tədrisi çərçivəsində cari ilin 15 sentyabr tarixində Ədliyyə Akademiyasında apellyasiya və I instansiya məhkəmələrinin hakimləri üçün “Mülki işlər üzrə məhkəmə baxışının xüsusiyyətləri” mövzusunda ixtisasartırma kursu keçirilib.

Kursda Bakı Apellyasiya Məhkəməsinin hakimi Abiddin Hüseynov, Şirvan Apellyasiya Məhkəməsinin hakimi İlham Əsədov və Azərbaycan Respublikasının Ədliyyə Nazirliyi İcra baş idarəsinin rəisi – Baş İcra Məmuru, baş ədliyyə müşaviri Nurəddin Mustafayevin təqdimatları dinlənilib.

Ölkəmizdə ədalət mühakiməsinin səmərəliliyinin artırılması üzrə həyata keçirilən islahatlar çərçivəsində hakimlərin tədrisinə xüsusi diqqət yetirilərək, bu sahədə Avropanın ən mütərəqqi modellərindən istifadə olunur, hakimlərlə sorğular keçirilərək onların tədrisinə ehtiyac bildikləri sahələr və mövzular öyrənilməklə tədris proqramları hazırlanır və Ədliyyə Akademiyası tərəfindən, o cümlədən beynəlxalq təşkilatlarla birgə mütəmadi tədris tədbirləri keçirilir.

Avqustun 4-də Ədliyyə Akademiyasında hakimlər üçün "Şəhərsalma və Tikinti Məcəlləsinin tətbiqi məsələləri" mövzusunda ixtisasartırma kursu keçirilib.

Üç ildir ki, UNİCEF, Ədliyyə və Polis akademiyaları, Ombudsman ilə birgə hakimlər, dövlət ittihamçıları, icra məmurları, polis əməkdaşları, yetkinlik yaşına çatmayanların işləri və hüquqlarının müdafiəsi üzrə komissiyaların əməkdaşları üçün “Uşaqlar üçün ədliyyə”, "Yetkinlik yaşına çatmayanların ədalət mühakiməsi" mövzularında hüquqi maarifləndirmə və bacarıqların artırılması məqsədilə treninqlər keçirilir.

Növbəti treninq iyulun 19-20-də Bakı şəhərinin Suraxanı, Xəzər və Pirallahı rayonlarının hakimləri, ədliyyə, prokurorluq, polis və yerli icra hakimiyyəti orqanlarının əməkdaşları üçün Daxili İşlər Nazirliyinin Polis Akademiyasında təşkil olunub.

Avropa Şurasının Azərbaycan üçün Fəaliyyət Planı əsasında həyata keçirilən “Avropa İnsan Hüquqları Konvensiyası və Avropa İnsan Hüquqları Məhkəməsinin presedent hüququnun tətbiqi” layihəsi çərçivəsində Ədliyyə Akademiyası tərəfindən paytaxtda və regionlarda silsilə təlimlər keçirilir.

İyulun 20-də Gəncə şəhəri Nizami Rayon Məhkəməsində Gəncə  Apellyasiya Məhkəməsinin yurisdiksiyasına aid olan birinci instansiya məhkəmə aparatı işçiləri üçün “Avropa İnsan Hüquqları Konvensiyasının 6-cı maddəsi (Ədalətli məhkəmə araşdırması hüququ)” mövzusunda  ixtisasartırma kursu keçirilib.